မအောင်မြင်သောညနေများ။
ညည်းစီစီ၊ရီဝေေ၀……………….ဒဏ်ရာမဟုတ်တဲ့ လွမ်းဆွတ်မှုပေါက်စလေးပါ။
ခွေးပေါက်ကလေး စမ်းဟောင်ကြည့်နေသလို ချစ်စရာအကြည့်လေး။ အနူးညံ့ဆုံးခွဲစိတ်ဓားပါးလေးရှမိသွားတဲ့နေ့ …………ယဉ်ယဉ်ကျေးကျေးငေးနေရုံပါ ……..။
သူ့ပါးပြင်ဘေးက လျပ်တိုက်ပြေးလွှားတဲ့လေညင်းလေးမဖြစ်ချင်ဘူး … သူ့အရိပ်လေး ကျောပေါ်ကဖြတ်သွားတာကိုပဲချစ်တယ်။ အအေးဆိုင်လေးမှာ ထိုင်နေဖြစ်တဲ့ညနေပေါင်းများစွာ …. ဖြတ်သန်းသွားတဲ့အရိပ်လေးပေါင်းများစွာ။ … အရိပ်လေးတွေကို ကျွန်တော် သီထားခဲ့ပါတယ်။ စိတ်နဲ့ကျစ်တဲ့ကြိုး … တစ်သီးပုဂ္ဂလ ပန်းပွင့်လေး ………………..၊ရွှေအိုရောင်မြူတွေလှတဲ့ လွမ်းဖွယ့်ညနေများ ကျွန်တော့်ဘ၀ကို လက်နက်ချထားပါတယ်။………………..။
သူ့ရဲ့ကြိမ်ခြင်းလေးထဲက လက်သုတ်ပုဝါလေးဟာ ကျွန်တော့်ရဲ့ရက်သတ္တပတ်တွေဖြစ်တယ်။ ချစ်နေခြင်းကိုဓာတ်ခွဲကြည့်ရင်တော့ ရူးသွပ်မှုတွေပဲပါမှာပေါ့ ……….၊ဒါပေမယ့်ဗျာ …. လွတ်လပ်စွာ အပြစ်ကင်းတဲ့ ရူးသွပ်ခြင်းတွေကို ဆာလောင်နေတဲ့စိတ်နဲ့ အဖြူရောင်အကြည့်တွေတောင်မပါဘဲ ချစ်စရာကောင်းတဲ့အရိပ်လေးတစ်ခုစာရှင်သန်နေတဲ့ ဘ၀လေးတစ်ခုဟာ သူ့အဓိပ္ပာယ်နဲ့သူရှိတယ်။ လက်ဆုပ်လက်ကိုင်အဖြစ် အရိပ်တစ်ခုရှိပါတယ်။ တိတ်ဆိတ်မှုကို ဂီတလို့သတ်မှတ်ရင် သူ့ကိုဆိုပြခဲ့တဲ့တိတ်ဆိတ်မှုဟာ အချိုဆုံးတေးသွားဖြစ်ပါလိမ့်မယ်။
တဒင်္ဂလေးပါပဲ။ သူဖြတ်သန်းသွားတိုင်း လန်းဆန်းသွားတဲ့ ကုမုဒြာတွေဟာ စိတ်ထဲမှာ အပြိုင်းအရိုင်းဖူးပွင့်လာကြတယ်။ သူ မစိုက်ပျိုးထားဘဲ အောင်မြင်နေတဲ့ဥယျာဉ်တစ်ခု။ ညနေခင်းတစ်ခုစာကြီးမြတ်ခဲ့တဲ့ နေ့စွဲများ၊ ဘယ်သူခြစ်သွားမှန်းမသိတဲ့ အအေးစားပွဲခုံပေါ်က အသည်းပုံနဲ့မြားတစ်စင်း၊ မြားဆိုတာ အသည်းကိုပစ်ဖို့လိုအပ်လို့လား။ သူ့အလင်းနဲ့လှနေတဲ့ကြယ်ကလေးကိုချစ်သလို၊ ပန်းဖူးလေးကို ဥယျာဉ်မှုးကချစ်သလို၊ ပိုင်ဆိုင်လိုခြင်းရဲ့အပြင်ဘက်မှာ အရိပ်လေးတစ်ခုစာလောဘနဲ့ တိတ်တဆိတ်ထိုင်နေတဲ့လူတစ်ယောက်ဘ၀မှာ ဘာမှ သိပ်အများကြီးမလိုအပ်ခဲ့ပါဘူး။
ပန်းပွင့်တွေရဲ့ကမ္ဘာမှာ နေရောင်ခြည်ဟာ အနှောက်အသွားလွတ်စွာဖြာကျနေသလိုပေါ့။ အရိပ်လေးရဲ့ မသိခြင်း နယ်စပ်မျဉ်းမှာ ကျွန်တော်နေထိုင်ပါတယ်။ ကျွန်တော့်ရဲ့သဲနာရီလေးမှာ သဲတွေကုန်စပြုလာပြီ။ အရိပ်လေးက ကျွန်တော့်ကို မလေးပင်စေပဲဖြတ်သန်းသွားသလို၊ ကျွန်တော်ကလည်း မမြင်ရတဲ့အရိပ်လေးဖြတ်သန်းသွားတဲ့အခိုက်အတန့်လေးကို တမ်းမက်မြတ်နိုးစွာ၊ရိုကျိုးညင်သာချစ်နေမိတယ်။
အချစ်မှာ မျက်နှာစာများစွာရှိတယ်ဆိုရင် ကျွန်တော်ကမသွေးထားတဲ့မှောင်ဖျဖျမျက်နှာပြင်ဘက်ခြမ်းက အချစ်မျိုးနဲ့ချစ်တယ်။ အလင်းမပြန်ဘူး။ တိတ်ဆိတ်တယ်။ ချစ်နေခြင်းအားဖြင့် သူ့ကို အထိတ်တလန့်ဖြစ်စေမှာမဟုတ်ဘူး။ ချစ်ခြင်းအားဖြင့် တစ်ခုခုဖြစ်ချင်တဲ့ဆန္ဒမရှိဘူး။ ဆောင်းရာသီမှာ သူဝတ်ထားတဲ့ငုဝါရောင် ဆွယ်တာလေးကို ချစ်တာထက်မပိုတဲ့အချစ်၊ သူ့ခြေသန်းက ပလက်တီနမ်ခြေစွပ်လေးကိုချစ်တဲ့အချစ်ထက်ကြီးမြတ်တဲ့အချစ်မဟုတ်ပါဘူး။ သူဟာ ကျွန်တော့်စိတ်လေးနေထိုင်ဖို့လုံလောက်အောင်ပြည့်စုံတဲ့အရိပ်လေးတစ်ခုစာကမ္ဘာဖြစ်ပါတယ်။
ကောင်းဘွိုင်တွေဟာ တစ်ယောက်ရဲ့ဘွတ်ဖိနပ်ကို တံထွေးနဲ့ထွေးလိုက်ရုံနဲ့စိန်ခေါ်ပွဲတွေဖြစ်လာခဲ့တယ်လို့ဖတ်ခဲ့ဖူးတယ်။ ကံတရားရဲ့တံထွေးစက်တွေပေကျံနေတဲ့ ဘွတ်ဖိနပ်လေးတစ်ခုကို ခင်ဗျားတို့တွေ့မိကြမလားမသိဘူး။ သဲနာရီမှာသဲတွေကုန်သွားတယ်ဆိုတာ သဲတွေက တခြားတစ်ဖက်ခြမ်းကိုရောက်သွားတာကိုဆိုလိုတာမဟုတ်လား။ သဲနာရီကို ပြန်လှည့်ခွင့်မရခဲ့တဲ့ဘွတ်ဖိနပ်တွေဟာ ဘယ်လိုခရီးကိုဘယ်လိုထွက်ခွာသွားကြသလဲ ……………။ ကျောပိုးထားတဲ့အရိပ်လေးကို ရင်ဘတ်ထဲပြောင်းလွယ်ပြီး ထွက်လာခဲ့တဲ့ခရီး၊ နွေရာသီတွေတပ်ဆင်ထားတဲ့လမ်းမ၊ကန္တာရတွေ သံခွာတပ်ထားတဲ့ကုလားအုတ်များ၊ အိုအေဆစ်ကင်းမဲ့ဇုန်၊ သီးခြားဆန်သော ကြမ်းရှရှလေ ………………..။ တိတ်ဆိတ်ခြင်းဟာ ဂီတတစ်ခုဖြစ်ခဲ့သလို၊ဆူညံခြင်းဟာ ငရဲဘုံဖြစ်ခဲ့ပါတယ်။
သိပ်ချစ်တယ်ဆိုတာဘာများလဲ။
ရင်ဘတ်ထဲလွယ်ထားတဲ့အရိပ်လေးတစ်ခုပဲမဟုတ်လား …………..ညနေခင်းတို့ရယ်။ ။
No comments:
Post a Comment